Monday, October 5, 2009

"Waansinnig mooi" -- wel, amper! (2)

Yellowstone – die wêreld se heel eerste nasionale park (1872)


(Brosjurefoto)

Met die helfte van die wêreld se geotermiese verskynsels (dit is, fantasties gekleurde warmbronne, kokende modder- en stoompotte) en sy meer as 300 spuitbronne (2/3e van almal op aarde), is dit g’n wonder dat hierdie park as Wonderland en Geyserland bekend geword het nie.


(Yellowstone is egter baie meer as warm grondwater en spuitende stoom. Meeste daarvan is hoë plato, omring met berge met baie riviere, pieke, mere, diep klowe en grote woude.)


En hierdie kaart dui maar 'n pinkiegrootte van die warm- en spuitbronne aan:


Kokende warmbronne.


Maar ook is hierdie pragtige plek volgens geoloë ‘n ware “smoking gun” wat net bewys hoe gewelddadig die aarde kan wees. Sowat 640 000 jaar gelede (en hier moet ek my oorlede ou moeder aanhaal: “lieg hulle, dan lieg ek nou”), het hierdie gebied ‘n ongelooflike vulkaniese ontploffing beleef. Binne enkele minute is die landskap verwoes. Vinnig-vloeiende as het duisende vierkante myl bedek.


En reg in die middel het daar net ‘n smeulende caldera oorgebly – dis ‘n ‘ge-koelêpste’ krater van 45 by 30 myl. En dis bo-op hóm dat mens al hierdie wondere kan aanskou.


Hierdie ene binne-in die Yellowstonemeer (die grootste meer in die VSA), staan as die Viskookpot bekend want, so word vertel, vroeërjare het die vissermanne sommer hul vangs hier ingedompel en gaargemaak. ('n Bietjie van 'n anderster visstorie vir 'n keer.)


Die Morning Glory.



'n Mens loop nog so met die paadjie aan (GROOT boetes as jy sou waag om af te dwaal), dan hoor jy net "blurp-blurp" soos die modder in die gate hier langs jou kook!

En kan mens glo dat in hierdie "niksheid" van grinterige vulkaniese gruis, 'n blommetjie kop uitsteek! ('n Les om altyd te blom waarook al ek geplant word....)

Die kleurespel van die afloopwaters het my elke keer opnuut betower:





En so vir oulaas, nog drie asemrowende warmbronne.




(Volgende keer kom die spuitbronne aan die beurt.)

4 comments:

Sonja said...

Dit is die interessantste verskynsels!

Thea said...

Die water se kleure is ongelooflik mooi en wat 'n interessante plekkie op hierdie groot planeet wat Aarde heet. Kan jy dink as mens al hierdie "vuurwerke" van 'n afstand af kon beskou miljoene jare gelede Mariki?? Wat 'n skouspel moes dit nie gewees het nie!

Dané said...

Wat 'n wonderlike plek. Dis ook op my lysie van besoek, maar....

Julle het duidelik 'n besondere vakansie geniet. Dankie dat jy dit deel.

mariki said...

Dit kan jy weer sê, Sonja!

Gits Thea, nog nie só daaraan gedink nie!


Dané, as jy kan -- gaan!

Dankie, die reisie was waarlik besonders.